Givenchy

Givenchy Paris dəbdəbəsinin sinonimidir. XX əsrin məhşur ulduzları Grace Kelly, Elizabeth Taylor, Jackie Kennedy və Givenchy-nin ilham pərisi Audrey Hepburn bu markanın vurğunu idilər. “Haute Couture” yüksək dəb sinifinə aid olan brend müasir dəb qurucularından hesab olunur.  Hubert de Givenchy 1952-ci ildə markanı təsis etmişdir. 1955-ci ildə dizayner idman üslubunda ilk don təqdim edir və bu don daha sonra simvola çevrilir. Givenchy-nin dizayn etdiyi ayaqları vurğulayan, şar formasında palto, “gəlincik don” və boş siluetlərin yer aldığı geyimlər dəbsevərlərin diqqətini çəkir. Geyim kolleksiyalarında, həmçinin qollara aksent verməyi xoşlayan dizayner,  Dior-la müqayisə olunur və onun geyim kolleksiyası “daha cəsarətli” adlandırılır. “Tiffani yaxınlığında səhər yeməyi” filminin baş rol ifaçısı Audrey-nin geyimləri, xüsusən qara libası bu gün də, dəb aləmində etalon hesab olunur. 1957-ci ildə brendin L’Interdit adlı ilk ətri ictimaiyyətə təqdim olunur. 1969-cu ildə isə Gentleman Givenchy adlı kişi kolleksiyası nümayiş olunur.

1979-cu ildə Givenchy ilin adamı və Best jurnalının sorğusuna əsasən “Ən eleqant kişi” seçilir.

1983-cü ildə Givenchy "Fəxri Legion Ordeni kavaleri" adına layiq görülmüş, 1985-ci ildə isə mədəniyyət naziri Paris operasında bayram zamanı eleqantlıq sənətinə həsr olunmuş "Oskar" mükafatını ona təqdim etmişdir.

40 ildən çox dəb aləmində olan dizayner 1995-ci ildə təqaüdə çıxır. Hazırda marka LVMH tərkibində fəaliyyət göstərir.